Damb era arribada deth bon temps, es oelhes transumants procedentes de França e deth Baish Aran ja an iniciat era sua estada enes peisheus de nauta montanha d’Uishèra, Estat Long e Montude, atau coma enes sectors de Sant Miquèu, Sorribau, Planhèra Ribenta, Alanassi e Plaitèish, a on contribuïssen a mantier era vegetacion neta e equilibrada. 


Ath long des proplèus mesi, enquia finaus d’octobre, aguesti ramats realizaràn ua foncion fòrça importanta entath nòste territòri. Era ramaderia extensiva non sonque manten vieua ua activitat tradicionau estretament ligada ara nòsta istòria e cultura, senon que tanben ajude a conservar es païssatges dubèrts de montanha, afavorís era biodiversitat e redusís era acumulacion de vegetacion seca, contribuïnt atau ara prevencion des huecs forestaus. 

Ath madeish temps, se consolide era agrupacion de ramats impulsada peth Conselh Generau d’Aran, ua iniciativa que facilite era conviuénça damb es grani carnivòrs presents en nòste entorn e que refortilhe era gestion e era sostenibilitat dera ramaderia de montanha. 

Cuedar es peisheus ei cuedar eth nòste païssatge, era nòsta biodiversitat, era nòsta cultura e eth futur des nòstes montanhes.

HÒNT: AJUNTAMENT DE VILAMÒS