ACTUALITAT
Eth govèrn d’Aran distribuís 500 colièrs damb contròl GPS entre es ramadèrs dera Val d’Aran
Damb aguesta accion s’a dotat a toti es ramadèrs e ramadères d’Aran d’aguest esturment tath contròl e gestion deth bestiar ena montanha, laguens des trabalhs de supòrt ath sector
Eth Conselh Generau d’Aran a distribuït 500 unitats de colièrs damb sistèma GPS, que permeten qu’es ramadèrs dera Val d’Aran poguen controlar eth sòn bestiar. Aguesta airina s’a metut a disposicion de tota era pagesia, qu’a decidit de manèra particulara receber-la o non, en tot èster eth dusau repartiment qu’a permetut dar cobertura a tot eth sector ramadèr. En 2023, eth Conselh Generau d’Aran ja ne despartic 450 unitats.
En cas d’incidéncies damb es equips GPS o damb era madeisha aplicacion, eth personau tecnic de supòrt ramadèr se n’encuede de solucionar quinsevolh problèma que i pogue auer, en tot reemplaçar es unitats maumetudes s’ei de besonh.
Entà Francisco Bruna, conselhèr de Territòri, Paisatge e Cambi climatic: “Damb aguesta accion barram era actuacion encetada ara hè dus ans, entà corbir es besonhs de tot eth territòri e corbir atau era totalitat des demanes”.
HÒNT: CONSELH GENERAU D'ARAN
